Hyderabad

Radical changes in the education system! Will the authorization of private schools come under the purview of a new board?

Radical changes in the education system! Will the authorization of private schools come under the purview of a new board?

By ·

Share this article
Radical changes in the education system!   Will the authorization of private schools come under the purview of a new board?

 

 

విద్యావ్యవస్థలో సమూల మార్పులు!

ప్రైవేటు పాఠశాలల అనుమతులు.. కొత్త బోర్డు పరిధిలోకి?
 

టీమీడియా , నవంబర్ 19,  హైదరాబాద్​  బ్యూరో :తెలంగాణ విద్యావ్యవస్థలో కీలక పరిపాలనా మార్పులకు ప్రభుత్వం సిద్ధమవుతున్నట్లు తెలుస్తోంది. పాఠశాల విద్యాశాఖలో ఇంటర్మీడియట్ విద్యాశాఖ విలీన ప్రక్రియలో భాగంగా కొత్తగా సీనియర్ సెకండరీ బోర్డును ఏర్పాటు చేయాలనే ప్రతిపాదన తెరపైకి వచ్చింది. ఈ బోర్డు ఏర్పాటైతే ప్రైవేటు పాఠశాలలకు అనుమతులు, అనుబంధ గుర్తింపులు జారీ చేసే అధికారాల్లో మార్పులు చోటుచేసుకునే అవకాశం ఉంది.
ప్రైవేటు స్కూళ్ల అనుమతులు కొత్త బోర్డుకే!
ఇప్పటివరకు 1 నుంచి 7వ తరగతి వరకు పాఠశాలలకు జిల్లా విద్యాశాఖ అధికారులు (డీఈవోలు), 8 నుంచి 10వ తరగతి వరకు ప్రాంతీయ సంయుక్త సంచాలకులు (ఆర్‌జేడీలు) అనుమతులు మంజూరు చేస్తున్నారు. అయితే కొత్తగా ఏర్పాటు చేయనున్న సీనియర్ సెకండరీ బోర్డు పరిధిలోకి ఈ అధికారాలను తీసుకురావాలని విద్యాశాఖ ప్రతిపాదిస్తున్నట్లు సమాచారం.
రెండు బోర్డులు ఎందుకు?
ప్రస్తుతం పదో తరగతి పరీక్షలను ఎస్‌ఎస్‌సీ బోర్డు నిర్వహిస్తుండగా, 1 నుంచి 10వ తరగతి వరకు సిలబస్ రూపకల్పన బాధ్యత ఎస్‌సీఈఆర్‌టీ చూస్తోంది. ఇంటర్మీడియట్‌లో మాత్రం పరీక్షల నిర్వహణతో పాటు సిలబస్ రూపకల్పన బాధ్యతలను ఇంటర్మీడియట్ బోర్డే నిర్వహిస్తోంది. ఈ నేపథ్యంలో ఎస్‌సీఈఆర్‌టీని సైతం కొత్త బోర్డు పరిధిలోకి తీసుకురావాలనే చర్చ జరుగుతోంది.
పది ప్రభుత్వ హైస్కూళ్లకు ఒక జూనియర్ కళాశాల!
రాష్ట్రంలో సుమారు 4,500 ప్రభుత్వ ఉన్నత పాఠశాలలు ఉండగా, ప్రభుత్వ జూనియర్ కళాశాలలు 430 మాత్రమే ఉన్నాయి. అంటే సగటున పది ఉన్నత పాఠశాలలకు ఒక జూనియర్ కళాశాల మాత్రమే అందుబాటులో ఉంది. దీంతో ప్రభుత్వ పాఠశాలల్లోనే 11, 12 తరగతులను ప్రారంభించడం లేదా జూనియర్ కళాశాలల సంఖ్యను పెంచడం అవసరమనే అభిప్రాయం వ్యక్తమవుతోంది.
సీట్లు ఉన్నా.. చేరికలు తక్కువ!
ప్రభుత్వ జూనియర్ కళాశాలల్లో ప్రస్తుతం 1.51 లక్షల సీట్లు అందుబాటులో ఉండగా, వాటిలో ఏటా 70 వేల నుంచి 80 వేల సీట్లు మాత్రమే భర్తీ అవుతున్నట్లు గణాంకాలు సూచిస్తున్నాయి. ఈ పరిస్థితుల్లో కొత్త కళాశాలల ఏర్పాటు, ప్రస్తుత కళాశాలల బలోపేతం, విద్యార్థుల చేరికలు పెంచడం ప్రభుత్వానికి సవాలుగా మారనుంది.

టి మీడియా విశ్లేషణ: బోర్డుల విలీనం, అధికారాల మార్పుతోనే విద్యావ్యవస్థలో సమూల మార్పులు సాధ్యం కావు. ప్రభుత్వ పాఠశాలల్లో మౌలిక సదుపాయాలు, ఉపాధ్యాయుల నియామకాలు, నాణ్యమైన బోధన, ప్రభుత్వ జూనియర్ కళాశాలల్లో వసతులు మెరుగుపడాలి. ప్రైవేటు విద్యాసంస్థల అనుమతుల ప్రక్రియలో పారదర్శకత, పర్యవేక్షణ పెరగాలి. అప్పుడే విద్యార్థులకు సమాన విద్యావకాశాలు లభిస్తాయి.

Tags: