జన సురక్ష యోజన పై  అవగాహన 

జన సురక్ష యోజన పై  అవగాహన 

పాల్గొన్న  ఉప సర్పంచ్ తుళ్లూరి ప్రకాశరావు

టీ మీడియా, అక్టోబర్ 23, అశ్వాపురం: అశ్వాపురం గ్రామపంచాయతీ కార్యాలయంలో నేడు స్టేట్ బ్యాంక్ ఆఫ్ ఇండియా అశ్వాపురం శాఖ ఆధ్వర్యంలో జన సురక్ష యోజన పథకాలు, ప్రమాద బీమా, జీవిత బీమా మరియు సైబర్ నేరాల నివారణపై అవగాహన కార్యక్రమం నిర్వహించారు.

ఈ కార్యక్రమానికి అశ్వాపురం ఉప పై అవగాహన సర్పంచ్ తుళ్లూరి ప్రకాశరావు అధ్యక్షత వహించగా, జిల్లా లీడ్ బ్యాంక్ మేనేజర్ రామిరెడ్డి ప్రత్యేకంగా హాజరయ్యారు. స్థానిక ఎస్‌బీఐ మేనేజర్ గోపీ ఆధ్వర్యంలో కార్యక్రమం నిర్వహించారు.
ఈ సందర్భంగా ముఖ్యంగా కేంద్ర ప్రభుత్వం అమలు చేస్తున్న ప్రధానమంత్రి సురక్ష బీమా యోజన,  ప్రధానమంత్రి జీవన్ జ్యోతి బీమా యోజన పథకాల గురించి ప్రజలకు వివరించారు.

రూ.20 ప్రమాద బీమా పథకం: సంవత్సరానికి రూ.20 ప్రీమియంతో ప్రమాద బీమా పొందవచ్చని, ప్రమాదవశాత్తు మరణం లేదా పథక నిబంధనలకు లోబడి ప్రమాద సంబంధిత అర్హతగల పరిణామాలు సంభవించినప్పుడు రూ.2 లక్షల వరకు బీమా రక్షణ లభిస్తుందని వివరించారు. ఈ పథకానికి 18 నుంచి 70 సంవత్సరాల వయస్సు గలవారు అర్హులని, బీమా రక్షణ ఎప్పుడు అమల్లోకి వస్తుందనే విషయం పథక నిబంధనల ప్రకారం ఉంటుందని తెలిపారు.

రూ.436 జీవిత బీమా పథకం: సంవత్సరానికి రూ.436 ప్రీమియంతో జీవిత బీమా పొందవచ్చని, పథక నిబంధనలకు అనుగుణంగా బీమా పరిధిలోకి వచ్చే మరణం సంభవించినప్పుడు నామినీకి రూ.2 లక్షల బీమా పరిహారం లభిస్తుందని వివరించారు. ఈ పథకానికి 18 నుంచి 50 సంవత్సరాల వయస్సు గలవారు అర్హులని, బీమా రక్షణ ప్రారంభమయ్యే తేదీ మరియు వర్తించే నిబంధనలను ఖాతాదారులు తెలుసుకోవాలని సూచించారు. అదేవిధంగా, సైబర్ నేరాలు, ఆన్‌లైన్ బ్యాంకింగ్ మోసాల పట్ల ప్రజలు అప్రమత్తంగా ఉండాలని, ఓటీపీ, ఏటీఎం పిన్, బ్యాంకు ఖాతా వివరాలను ఇతరులకు వెల్లడించకూడదని తెలిపారు. సైబర్ ఆర్థిక మోసానికి గురైతే వెంటనే 1930 హెల్ప్‌లైన్ నంబర్‌కు ఫిర్యాదు చేయాలని అవగాహన కల్పించారు.
ప్రతి ఒక్కరూ అర్హతను బట్టి బీమా పథకాల్లో చేరి కుటుంబానికి ఆర్థిక భద్రత కల్పించుకోవాలని, బ్యాంకు సేవలను సద్వినియోగం చేసుకోవాలని ఈ సందర్భంగా సూచించారు.

ఈ కార్యక్రమంలో ఎస్‌బీఐ బ్యాంకు అధికారులు, పంచాయతీ కార్యదర్శి యాకూబ్, గ్రామ పంచాయతీ సిబ్బంది మరియు స్థానిక ప్రజలు పెద్ద సంఖ్యలో పాల్గొన్నారు.