రాష్ట్ర ప్రభుత్వానికి హైకోర్టులో భారీ షాక్.., ఉత్తర్వులపై స్టే

0
TMedia (Telugu News) :

రాష్ట్ర ప్రభుత్వానికి హైకోర్టులో భారీ షాక్.., ఉత్తర్వులపై స్టే
టి-మీడియా/హైదరాబాద్(మే-14):
*అంబులెన్సులను అడ్డుకోవడంపై హైకోర్టు ఫైర్.
*ప్రభుత్వ ఉత్తర్వులపై స్టే.
*తదుపరి ఆర్డర్స్ వెలువడే వరకూ స్టే అని ఆదేశం.

s s consultancy

కరోనా నేపథ్యంలో రాష్ట్ర సరిహద్దుల్లో అంబులెన్సులు ఆపడం పై తెలంగాణా రాష్ట్రానికి హైకోర్టు లో చుక్కెదురైంది. వివరల్లోకి వెళితే తెలంగాణకు ఉన్న ఇతర రాష్ట్రాల సరిహద్దుల గుండా లోనికి ప్రవేశించే అంబులెన్స్‌లను పోలీసులు అడ్డుకుంటుండడంపై హైకోర్టు తీవ్రస్థాయిలో సీరియస్‌ అయింది. ప్రాణభయంతో వైద్యం కోసం వస్తున్న పేషెంట్లను ఎలా అడ్డుకుంటారని ప్రశ్నించింది. అంబులెన్స్‌లు ఆపే అధికారం తెలంగాణ ప్రభుత్వానికి లేదని తేల్చి చెప్పింది. తెలంగాణ ప్రభుత్వ ఉత్తర్వులపై హైకోర్టు స్టే విధించింది. తదుపరి ఉత్తర్వులు ఇచ్చే వరకు ఆదేశాలు అమల్లో ఉంటాయని కోర్టు స్పష్టం చేసింది. దేశంలో ఇలాంటి ఉత్తర్వులు ఎక్కడా ఇవ్వలేదని, ప్రభుత్వం రాజ్యాంగాన్ని మార్చలేదని పేర్కొంది. ఇతర రాష్ట్రాల ప్రజలకే కాదు హైదరాబాద్ వాసులకు కూడా బెడ్‌ కన్ఫామ్ అవ్వట్లేదని, నేషనల్ హైవే యాక్ట్‌ను ఉల్లంఘించడానికి ప్రభుత్వానికి అనుమతి లేదని తెలిపింది.
హైదరాబాద్‌కు వస్తున్న అంబులెన్స్‌లను సరిహద్దుల్లో నిలిపివేస్తున్నారని విశ్రాంత ఐఆర్‌ఎస్‌ అధికారి వెంకట క్రిష్ణారావు హౌస్ మోషన్ పిటిషన్ దాఖలు చేశారు. దీనిపై హైకోర్టు విచారణ చేపట్టింది. చీఫ్ జస్టిస్‌ హిమా కోహ్లి నేతృత్వంలోని ధర్మాసనం ఈ పిటిషన్‌ను విచారణ జరిపింది. అంబులెన్స్‌లు ఆపడాన్ని చట్టవిరుద్ధంగా ప్రకటించాలని, రాష్ట్రంలోకి అంబులెన్స్‌లను అనుమతించేలా ఆదేశాలివ్వాలని పిటిషనర్ కోరారు.
దీనిపై ప్రభుత్వం తరఫున అడ్వకేట్ జనరల్ ప్రసాద్‌ వాదనలు వినిపించారు. నాలుగు రాష్ట్రాల నుంచి హైదరాబాద్‌కు కరోనా బాధితులు వస్తున్నారని కోర్టుకు తెలిపారు. ఏపీ, ఛత్తీస్‌గఢ్‌, కర్ణాటక, మహారాష్ట్ర నుంచి రోగుల తాకిడి ఎక్కువైందని అన్నారు. ఆస్పత్రి ముందస్తు అనుమతి ఉన్నవారికి చికిత్స నిరాకరించడం లేదని కోర్టుకు తెలిపారు. ‘‘పడకలు అందుబాటులో లేక బాధితులు ఇబ్బంది పడుతున్నారు. తెలంగాణ ప్రజల ప్రయోజనాల కోసమే ప్రభుత్వం ఈ నిర్ణయం తీసుకుంది. ఆస్పత్రిలో పడకలు ఉంటేనే ఇతర రాష్ట్రాల రోగులు తెలంగాణకు రావాలని ఇంతకు ముందే చెప్పాం. దిల్లీ లాంటి రాష్ట్రాలు కూడా ఆంక్షలు విధించాయి.’’ అని ఏజీ కోర్టుకు తెలిపారు.
దీనిపై స్పందించిన న్యాయస్థానం అంబులెన్స్‌లను ఏ రాష్ట్రం ఆపలేదని తెలిపింది. కారణం ఏదైనా అంబులెన్స్‌లను ఆపే హక్కు ఎవరిచ్చారని ప్రశ్నించింది. జాతీయ రహదారులపై రాకపోకలు నియంత్రించే అధికారం రాష్ట్రానికి ఎక్కడిదని ప్రశ్నించింది. ఇలా చేస్తే జాతీయ రహదారుల చట్టాన్ని కూడా ఉల్లంఘించినట్లే అవుతుందని తెలిపింది.
తెలంగాణలోని ఇతర జిల్లాల నుంచి కొవిడ్ చికిత్స కోసం హైదరాబాద్‌ వస్తున్నవారు పడకలు ముందుగా బుక్ చేసుకున్నారా? అని హైకోర్టు ప్రభుత్వాన్ని ప్రశ్నించింది. పాజిటివ్‌ ఉన్నవారి వల్ల తెలంగాణలో వైరస్‌ వ్యాప్తి చెందకూడదనే ఉద్దేశంతోనే ఆంక్షలు విధించినట్లు వైద్యారోగ్యశాఖ ముఖ్య కార్యదర్శి రిజ్వీ కోర్టుకు తెలిపారు. ఇతర రాష్ట్రాల ప్రజలను అడ్డుకోవడం రాజ్యాంగం, చట్టాల ఉల్లంఘనే అవుతుందని ఏపీ ఏజీ శ్రీరాం అన్నారు.

(వెంకట్ బెజవాడ, టీ మీడియా అధికార ప్రతినిధి)

for telugu news live alerts like, follow and subscribe TMedia on FacebookTwitterYouTube
abhaya hospitals
Leave A Reply

Your email address will not be published.